Protokolle der Weisen von Zion

D Brotokoll vo de Wiise vo Zion si e antisemitischs Pamfleet, wo uf ere Felschig beruet. Es isch am Aafang vom 20. Joorhundert vo umbekannte Redaktöör uf dr Grundlaag vo meerere fikzionale Text zämmegstellt worde und gältet as en iiflussriichi Brogrammschrift vom antisemitische Verschwörigsdänke. D Brotokoll gäbe vor, ass si ghäimi Dokumänt vom ene aagääblige Dräffe vo jüüdische Wältverschwörer sige.

En ersti Version uf Russisch isch 1903 im Russische Kaiserriich erschiine. Noch em Erste Wältchrieg isch dr Text immer mee internazional verbräitet worde, au wenn er in dr Londoner Times scho 1921 as Felschig entlarvt worde isch. Bekannt worde isch bsundrigs d Usgoob us de 1920er Joor vom Henry Ford in de Veräinigte Staate und die dütschi Usgoob vom Gottfried zur Beek und vom Theodor Fritsch. Vo 1933 bis 1935 isch z Bärn im ene öffentlige Brozäss bewiise worde, as d Brotokoll e Felschig si, glaube no hüte Antisemite und Aahänger vo Verschwöörigstheorie in dr ganze Wält, bsundrigs in islamische Länder und in Russland, ass d Brotokoll authentisch sige.^[1]

1. ↑ Übersetzig vo dr Iifüerig zum Ardikel «Protokolle der Weisen von Zion» uf dr dütsche Wikipedia